سپریم کورٹ نے نااہلی کیس میں فیصل واوڈا کو دو آپشنز دے دیے۔۔

 

اسلام آباد: سپریم کورٹ نے جمعرات کو پی ٹی آئی کے سابق رہنما فیصل واوڈا کی تاحیات نااہلی کے خلاف درخواست کی سماعت کی۔

چیف جسٹس پاکستان عمر عطا بندیال کی سربراہی میں جسٹس منصور علی شاہ اور جسٹس عائشہ ملک پر مشتمل تین رکنی بینچ نے کیس کی سماعت کی۔

چیف جسٹس بندیال نے واوڈا کو دو آپشنز پیش کرتے ہوئے کہا، "فیصل واوڈا یا تو اپنی غلطی کا اعتراف کریں اور شق 63 (1)-C کے تحت نااہلی کو قبول کریں ورنہ عدالت شق 62 (1)-F کے تحت کارروائی کرے گی۔"

چیف جسٹس نے کہا کہ فیصل واوڈا کی نااہلی کے لیے عدالت کے پاس کافی شواہد موجود ہیں۔

جسٹس بندیال نے کہا کہ فیصل واوڈا کو تحریری غلطی تسلیم کرنا ہوگی۔

عدالت نے فیصل واوڈا کو کل (جمعہ) صبح 11 بجے ذاتی حیثیت میں طلب کر لیا۔

واوڈا نے الیکشن کمیشن آف پاکستان (ای سی پی) کے جاری کردہ فیصلے کے بعد اپنی تاحیات نااہلی کو چیلنج کیا تھا۔

پی ٹی آئی کے سابق رہنما نے اپنی درخواست میں مؤقف اختیار کیا تھا کہ الیکشن کمیشن کا انہیں تاحیات نااہل قرار دینے کا اختیار نہیں۔ ان کا موقف تھا کہ اسلام آباد ہائی کورٹ (IHC) نے ان کی درخواست جلد بازی میں خارج کر دی تھی۔

ای سی پی نے فیصل واوڈا کو جعلی بیان حلفی جمع کرانے پر تاحیات نااہل قرار دیا تھا۔

آئی ایچ سی نے ان کی درخواست کو بھی مسترد کر دیا تھا، یہ کہتے ہوئے کہ جعلی حلف نامہ جمع کرانے کے عمل کے سنگین نتائج ہیں جبکہ سپریم کورٹ کے لارجر بنچ کا ایک فیصلہ بھی دستیاب تھا جس میں متعدد ارکان پارلیمنٹ کو نااہل قرار دیا گیا ہے۔

چیف الیکشن کمشنر (سی ای سی) سکندر سلطان راجہ کی سربراہی میں ای سی پی کے ایک بینچ نے واوڈا کو اپنی دوہری شہریت چھپانے پر نااہل قرار دے دیا تھا جس میں ہدایت کی گئی تھی کہ وہ بطور وزیر اور رکن قومی اسمبلی حاصل کی گئی تنخواہ اور دیگر مراعات دو ماہ کے اندر واپس کر دیں۔ انہیں بطور سینیٹر بھی ڈی نوٹیفائی کیا گیا تھا